BnF. Département des manuscrits. Français 24428

[col. 1]

Mais james plus foons naura Qant einsis deseritei la Une meniere ira de jument Sanz faille· qui concoit dou vent En capadoce une contree Mais nest que ·iii· anz leur duree Cele part sont li olifant Grant sont & fier & combatant Qui sanc leur moustre devant eus Sensont plus fier & corageus Par touz lieus sose bien embatre Seur ciaus se voloient combatre Cil dinde & de perse sovent Bien enportent une tour grant De fust· plaine de gent armee Qant deseur son dos est fermee I· boel ont par dedevant Dont il mujuent· large & grant Dou prent bien ·i· homme & deveure & lengloutist en petit deure Les genz alixandre qui fu Rois · & bons clers de grant vertu Qui senala par mainte terre Plus por cerchier · que por conquerre Qant a ciaus combatre se dut Qui les olifanz orent dut & apris · de combatre aplain Si fist faire vessiaus darain Si com hommes touz plains de feus Qe il menoient devant eus Por combatre vers celes genz Qestoient seur les olifanz & qant li olifant getoient Leur boel donc la gent tuoient

[col. 2]

Si sardoient les musiauz tuit Tant quil les enorent si duit Qaprochier nosoient les hommes Por les samblances de leur formes Ains tenoient leur musiaus haut Car il cuidoient que li chaut Fussent tuit li autre com cil Einsi eschiva son peril Alixandres qui si fu sages & conquist ices genz sauvages & donta si les olifanz Qui mal nosoient faire as genz Olifant vont molt simplement Ensamble vont acordaument & quant sencontrent les chiez baissent Ausi com sil se salvaissent De molt froide nature sont Dont li dent qui divoire sont Linges dras qui deseur est mis Nart pas · ainz estaint charbons vis Tantost com on deseur le met Por la froidor qenlivoire est Nont feons · qune foiz lonc tans · Qen leur ventres portent ·ii· ans Trois cenz ars vit la suris doute Culueures & vermine toute Sa la culueure ensi sahert Si labat & la vie en pert Ses feons · & si les repont Ou bot ·& culueures ne sont Dedenz iaue feone ades Car sil cheoit de terre pres Jamais ne se releveroit Car leur os sont entier & roit

[col. 1]

Jambes ont des le ventre as piez Qant il dort si est apoiez A ·i· arbre ·& dort en estant Li veneor qui nont cerchant / Les iamb^res a coi il sapoient Leur trenchent par desouz & soient Si qa terre ne chieent pas & cil qui ne seit pas le qas Qant la sa poie si chiet ius Ne ne se puet relever sus Lors barrille & gemist & pleure Tant qaucune foiz vienent seure Autre olifant por lui aidier & qant nel pueent redrecier Si gemissent & font dolour & li petit qui vont entour Mucent par desouz se soulievent Tant qaucune foiz le relievent Einsi sont eschapei de mort Aucune foiz par tel effort Mais qant nel pueent relever Si leur comment leisier ester & senvont gemissant ades & cil qui sont reponu pres Les prennent par leur estrumens Einsi prent on les olifans Ou flun dinde qui anon ganges Vont les cinguiles aganz ranges Qui ont bien ·ccc· piez de long Qon menjue bien a besong Mainte autre beste monstereuse A en inde orrible & hideuse Dragons serpens & autres bestes Qui chevolx ont encors en testes

[col. 2]

Iluec li baselique sont Qui si velimeus regarz ont Qe dou regart diaus seulement Ocient il oisiaus et gent Teste ont de coc· cors de serpent Nule beste ali ne se prent Rois est seur touz autres serpens Com seur bestes li hom poissanz Si est blanz roiez ca & la La terre par ou il senva Naura jamais herbe ne fruit Nes li arbre enperissent tuit Se morz a beste nautre chose Ja mais beste aprochier ni ose Si ra en cele region Serpens a cornes de mouton ·I· autre ira qanon aspis Qui ne puet estre nul jor pris Nenchantez se par douz chant non Dont oient volentiers le son Mais qant chanter premiers escoute Sa qeue enses oreilles boute Quil ne loie ·& se trait ensus Por ce quil ne soit deceuz Autres ira qont non tigris Que len prent aucune foiz vis Cest cil dou on triacle fait Qautre velin oste & deffait Une meniere ira de vers Au· braz si lons & divers Qe les olifanz en abatent & tuent quant pres diaus senbatent Li serpens vit molt longement & quant vieuz & febles se sent

[col. 1]

Si se confont par geuner & se laisse si afamer Qe po li remaint de son cors Lors se met par ·i· pertuiz fors Daucune pierre molt estroit Lors se met outre ateil destroit Qui lapiaus idemeure entiere Lors li vient autre piaus arriere Einsi reforme son aage Comme beste qui molt est sage Serpenz ira dautre meniere Qui mainte precieuse pierre Entestes & en ieus leur sont Qui maintes vertuz en iaus ont En inde croist li aimanz / Des pierres Une pierre de vertuz granz / dinde Qali trait fer & laravist Par la vertu qui en li gist Lacroist li diamanz entiers Qui ne puet estre depeciez Nusez se par sanc de bouc non Sira autres de grant renon Esmeraudes · qui la veue Conforte · qant on la veue Li charboncles iest luisanz Qui luist comme charbons ardanz Si asafirs· qui enfleure Ostent· & dieuz enflameure Topace qui ont couleur dor & rubiz qui vaut melx encor Si a dautres pierres assez Qui en eles ont granz bontez Mais qui savoir veut leur afaire Si aille lire ou lapidaire

[col. 2]

Qui dist leur nons & leur vertuz Car ci nendirons nouz or plus · Des contrees dinde En inde a meintes granz contrees De genz & de bestes pueplees Une enia ·perse est ses nons & tient ·xxiii· regions Dont lune est parse une contree Ou premerains fu controvee Une arz · qui nigromance anon Qenniemi fait estre enprison Lacroist une poiz quist si ^cha^ude Qui lamein dou tenant eschaude Qavoec la lune vait croissant Et en son decourz descroissant De cele poiz saident bien Cil qui sont nigromancien Apres est mesopotamie Ou ninivei fu establie Une citetz de grant nommee Qui de " jorz a · iii· " lonc jors dalee Une tour a en babyloine Qui fu faite par grant essoine Dont li mur sont fort haut & bel & lapelon la tour babel Qui de haut · a tout envirois Qatre mile piez iconqenson En la region de caldee Eu astronomie trovee Encele est la terre de sable Puiz est tarse puiz est arabe De ces troiz furent li troi roi Segnor· qui le soverain roi Jhesucrist · qant neiz fu en terre

[Intial, col. 1, lines 15–16: Littera florissa /E/, 2 lines, in red, ornamented with penwork in blue with touches of red, extending into left margin to form partial border]

[Intial, col. 2, lines 3–4: Littera florissa /E/, 2 lines, in blue, ornamented with penwork in red with touches of blue, extending into intercolumnar space to form partial border]

[col. 1]

Alerent comme dieu requerre Lacroit li mirre & li encens & si a maint pueple de gens Si est assire granz province & la regions de fenice Qui prent non de loisel fenis Dont il nest ades quns seus vis Qant muert si renaist ses oiseaus Granz est de cors & molt est beaus Ou chief a une creste enson A la meniere dun poon Pis & gorge li resplendist A couleur dor & si rougist Comme rose par seur le dos Envers la qeue est aussi blos Com est li cieus qant il est purs & qant daage est bien meurs Lors vait en ·i· mont haut & bel Ou il renouvele sapel Seur ce mont sourt une fonteine Molt large· & grant · & clere· & seine & a ·i· grant arbre desus Qe onvoit de molt long ensus La fait son sepulcre & son ni Deseur cel arbre tout enmi Des peices de si granz oudors Qon ne porroit trover meillors Puiz se dresce deseur son ni Qant il la fait & bien furni Si muet ses elles & debat Vers le soloil tant quil sembat Encors · une si granz chalour Quil emprent · & art tout entor //// [Tant que to]uz arz / [& bro]iz est Lors vient ·i· autres si renaist.

[col. 2]

Puiz vient damas & antioche Ou il a mains chasteaus seur roche Palatine & puiz samarie Sebaste & puiz mantapolie Y sodome & gomorre ifurent Deus citeiz · qui percliter durent & cele part est lamers morte Qui en li · riens vive ne porte Hysmaelite une contree Iest qeinsi est habitee De xii· menieres de genz Puiz si vient egipte la granz Ou nue ne pluie ne vient Qui ·xiii· pueples contient Si a une grant region Qui est devers septemtrion Ou il ne repaire nus hom Forz fames fieres com lion Qui vers les homes se combatent En champ & ruent & abatent Armees comme chevalier & ont les treces par darrier & sont molt preuz en touz essoines & les apelon amazoines & ont homes pres de leur terre Qeles vienent chascun an querre Por estre ·viii· iorz ou ·xv· ensanble Tant qengendret ont ce leur samble Lors sendepartent & sevont & celes qui les enfanz ont Se femele est li la retienent & les marles qaage vienent Norrice · par ·v· ans ou sis Puiz les metent fors dou pais

[col. 1]

Molt beles fames ra aillours Qui en bataille & en estours Usent toutes darmes dargent Por defaut de fer seulement En bois dinde autres fames sont Qui les barbes si larges ont Que jusqas memeles sarestent & de peaus de bestes se vestent & vivent de bestes sauuages & les prennent par ces boschages Si sont homme & fame tuit nu Si comme bestes· tuit velu En eaue & en terre habitanz & q[u?]a voient les autres genz Si se fierent en leaue lors Si que point nempert dedefors Autres genz ira com tatanz Veluz com pors· & tuit gisanz Autres fames isont moult beles blanches comme nois tout pareles forz tant que denz ont comme chien & habitent en eaue bien Vne grant region ira Qarante & quatre pueples a la sont oisel plein de deduit Dont les pennes luisent par nuit Cele part sont li papeiai Si ne sont pas plus grant que jai Tuit uert & luisant com poon Dont li plus gentil ce dist on Ont en chascun des piez· vi· doiz & li vilain nenont que troiz Qeue a longe comme vne pie bec courbe & grant leingue furnie

[col. 2]

Qui le norrist plus de ·ii· anz Si aprent aparler as genz J· autre ia pellicanus Qui est einsi comme chenus Qant ses poullons lesse & revient Por paistre· si com il convient Sestrueve morz ce li est uis lors fiert son bec enmi son pis Tant que li sanz en raie forz Dont li poullon ravivent lors En armenie a vnes gens Qui trestuit ont les cheuolx blans Vn grant mont en armenie a Ou larche noei reposa Qant li deluges fu passez Dont vouz aveiz oi asseiz Daise lamenor · Apres uient aise la menor Qui close est diaue tout entor Ou il a maintes regions Dont touz les nons pas ne savons En cele siet frise & dardaine La ou pa[r?]ris ravi elaine Dont troie la grant fu destruite Qen la fin de grece est construite Cele part est licaonie & vne autre qanon charrie Ou hermes cort ·j· fluns molt granz Dont la gravelle est dor luisanz De cele part devers la fin Nouz vient la paillole dorfin De lautre part uers orient Sont vne meniere de gent Qui descendirent des [cjuis]

[Initial, col. 2, lines 17–18: Littera florissa /A/, 2 lines, in red ornamented with penwork in blue with touches of red, extending into intercolumnar space to form 1-sided border]