BnF. Département des manuscrits. Français 24428

[col. 1]

& ensi volsist il ou non Feist il bien & sanz raison Car ce ne fust mie par lui Qil feist bien mais par autrui Qar le veust entalentei A force & doner volentei & cil par cui il le feist Le guerredon en deservist Non pas il car peust desert Qui par force dautrui messert Qui me metroit por faire bien Demain en prison malgre mien Je non tenroie pas a sage Car il me feroit grant outrage Bien leust fait dex sil volsist Mais ja tel bien ne deservist Com il fait ore de mil tans & por ce fait dex teiz les gens Qui plus de bien avoir peussent Ja autrement tant ne veussent Se dex a fait ses angles teiz Quil be puissent pechiez morteiz Ne mal faire · ja li vaut dons Ne deserviront · com li hons Mais qui voldroit bein deservir Si doit volentiers touz servir De cuer delivre par amor Por conquerre plus haute honor Si volt dex que li hom tex fust Que par droit deservir peust Autant de bien a son endroit Com il meismes en avoit & li dona sens & raison Davoir vers point un entencion Car par droit servir le devoit

[col. 2]

Si est folx qui ne se porvoit De bien faire car tuit li bien Que chascuns fera seront sien Si en aura por ·i· bien cent & por ·i· mal en aura cent Sest folx cil qui cuide de rien Faire deu bontei de son bien & quant de mal faire se tient Forz tant que dex plus cher lentient Car se touz li mons le perdroit Ja por ce dex pis ne vaudroit Ne bien quil ait en poestei Se tuit li saint qui ont estei Au monde & qui mais isseront Neussent fait nul bien au mont & dampner se fussent trestuit Ja por ce dex moins de deduit Neneust · nenenvausist pis Ne rien qui fust en paradis Mais li saint furent sage & preu & bien sorent faire lor preu Com cil qui aparsurent bien Que li siecles ne valoit rien Si orent plus chier mal soufrir & leur cors a martire offrir Por deu a honte & a laidure En cest siecle qui so po dure Por avoir les bien a touz dis & la joie de paradis Qui avoir laise au cors muable Por estre en paine perdurable Si norent cure de tex biens Qui en la fin ne sont fors fiens Ains prirent si le frame as dans Que pardis sont tuit dedanz

[col. 1]

Maint les tinrent au monde fols Qui or ont bien chergiez les colx De ce dont il sont deschergie Quen paradis sont herbregie Encor tient on maint sage a fou Qui lor paroles prisent pou Maint saint sont or en paradis Que sil prisassent les folx dis Des gens tant com au monde furent Neussent pas fait ce quil durent Le plus perdissent por le mains Ensi com font orendroit mains Qui tant covoitent avoir lols Que por la parole des fols Laissent a faire les biens deu Dont li saint firent bien lor preu Ne leisserent pas por delis Deu asorvir · por paradis Ou il ont joie & toute honor Com cil qui en sont tuit segnor & sautrement leussent fait A des eussent honte & lait En enfer ou touz maus habonde Si est granz merveille dou monde Comment cest que tant de gent font Qui plus de peine souferront Por le lols des genz aquester Ou por avoir a amasseir Qui si po de tans lor demeure & si lor faut en si po deure Que por conquere ne feroient Les biens deu qui ja ne faudroient Que li saint ont or en baillie Por ·i· petit de dure vie

[col. 2]

Qui ne samble forz que delis A ceaus qui de cuer si sont mis & a la fin lor est avis Qui por nient ont paradis · Ausi le puet avoir chascuns & des biens deu estre communs & avoir la joie saintime Sil ne perist en lui meisme Mais cil qui la gloire desirent De cest monde itant sen enpirent Que nul bien ne pueent aprendre Ne alor sauvement entendre Si ont plus chier laise dou cors Que laise de larme a touz iors Ne ne prisent bien ne savoir Domme sil ne se seit avoir Au siecle · & na avoir asseiz Par quil soit au monde aloseiz Ains dient quil est fols et nices Por ce quil ne sient lor malices Mais tuit cil de deu sont maldit Par la bouche le roi davit Qui au monde ne pueent plaire Por nule rien quil puissent faire Car cest orgoil & chose vaine Par coi larme nest mie saine Dont david dist en son psautier De coi on sert deu au moustier Maudit dist il sont trestuit cil & confuz come gent dessil Qui au monde plaisent de riens Car eslongie sont de touz biens & de deu sostent & descordent Puis quil sont tel quil sacordent

[col. 1]

Car dex les a touz en despit & sa grace leur escondit Porce qau monde quierent los Ou il fu tenuz comme sos & puis dist dex en levuangile Qui ne parole pas par guile Tuit cil boneurei seront Qui le monde en despit aront & des genz seront hai & dechaci & envai Com fol por amor de mon non Car en ciel enont guerredon Si pueent veoir plainement Que se dex meismes ne ment & veriteiz fauseteiz nest Que tuit cil cui li mondes plest & qui le los dou monde acueillent Ne puet estre quil ne sendueillent Cil est fox qavoir enquiert point Car tuit cil sont en malvaiz point Qui point enquierent & porchacent Car deable en enfer les chacent Qui diaus sont dolereus convoi Ja ni aura si cointe roi Ne duc ne conte si poissant Que deables nenface tant Com dou plus vil quen enfer viengne Sil fait tant quasses cros le tiegne Vil & ribaut trestuit devienent Roi & prince qui laiens vienent Mult se doit plaindre de ses maus Qui rois est · & la iert ribaus Quant en paradis puet conquerre Plus que noble roiaume quen terre Car qui desert tant com est vis

[col. 2]

Il en est rois en paradis · Plus que li saint qui furent onques Au monde · or le servommens donques & si laissons le monde atant Puis qoi avons ci devant ; ··· Si vous dirons apres la forme ; Porcoi dex fist le monde & lomme ··· Dou monde selonc la facon Comment il est faiz environ Mais raisons est que vouz disons Des ·vii· ars & de lor raisons Comment eles trovees furent Par ciaus qui de bien saparcurent Car par eles seit on les faiz Dou monde comment il est faiz Si en devons parler devant Por melx entendre le samblant Comment et pour coi les set ars furent trovees premierement · Or dist li livres en partie Qui est estraiz dastronomie Comment li sage canarriere Voldrent enquere la meniere Dou monde comment faiz estoit Dont chascuns mult se merveilloit Quant li mondes fu compasseiz Qil iot des genz asseiz Si regarderent li plusor Le firmament · qui tout entor Se movoit · si senmerveillierent Comment cestoit· si enveillierent Par maintes nuiz & par jour cleir Lors prenoient a regardeir Les estoiles qui se levoient Vers orient & se movoient

[Intial, col. 2, lines 19–20: Littera florissa /O/, 2 lines, in red, ornamented with penwork in blue with touches of red, extending into intercolumnar space to form partial border in red and blue]

[col. 1]

Environ par deseur lor testes Ni pensoient pas comme bestes Qui ne quierent forz lor pasture Si comme font cil qui nont cure Forz a vivre comme porcel & sovent aaisier lor pel Ains veillerent par maintes nuiz Si ne lor estoit pas anuiz Quil veoient si noblement Movoir trestout le firmament Les estoiles movoir veoient Jusqatant queles se couchoient Contre orient par dautre part Lune tost & lautre plus tart Einsi regardoient entor Le firmament deci au ior Quil reveoient le soleil Au main lever cleir & vermeil Qui la meitie dou jour montoit & lautre meitie descendoit Tant quil se prenoit a couchier & la nuit faisoit aprochier & lors revenoient la nuit les estoiles en lor deduit Tant que li solaus revenoit Qui tout le monde enluminoit & sen aloit droit son chemin Tant quil reperoit au matin Si regarderent en la lune Qui diversement estoit une Selonc ce quele estoit au monde A lune foiz estoit reonde & a lautre aparoit demie ausiz comme parmi trenchie

[col. 2]

Apres cornue devenoit Ensiz defaillant sen aloit Tant quele nestoit plus veue & puis raparissoit cornue Puiz demie & puiz toute plaine Si com devant & ausiz saine Puiz sorent bien par lor artel Que le saprochoit dou solel Jusqa tant qendroit lui estoit & puis des lors sendepartoit & apres senreslongnoit plus Tant quele restoit si ensus Si com ele avoit fait avant & puiz senraloit aprochant ; „- Ensi jor & nuit sen aloit ; Puiz senpartoit & revenoit „- Tornoiant & faisant son tor Avoec le firmament entor Ensiz com ele fait encore Sanz rien muer· mais les gens dore Pensent or plus a autre afaire Por lor [?]lasses peaus grasses faire Qui si tost vient a poureture Par leur vilaine norreture Qui les livre a hontex essil Ensiz ne faisoient pas cil Car ne queroient ja mengier Forz quil peussent alegier Leur faim por leur cors sostenir & leur vie en santei tenir Si que de leur senz se peussent Aidier ensiz com il deussent Por venir a la droite sente De la gloire deu dont li trente

[col. 1]

Vivoient lors plus longement Que ne font orendroit li cent Par contenance vaine & fole Netendent pas bien la parole Que jhesucris dist au deable Qui le cuida tempter par fable Quant il li dist que pain feist De pierre & dex tantost li dist Li hons ne vit pas de pain soul Qui son ventre li fait saoul Mais il vit de cele parole Qui larme fait sage non fole Se bien ceste chose entendoient Plus volentiers en apenroient Les paroles qui de deu vienent Mais les gentz rentes quil retienent Leur vies si lor amenuisent Par les mengiers qui tant lor nuisent Que nature nel puet soufrir Ainz lor estuet plus tost morir Ainsiz li gentz avoirs lor amble Leur senz & leur cuers si ensamble Que petit se vient a la mort Dont plusor sont dampnei et mort Qui conseillier ne se pooient Qant meillor mestier en avoient Ne vivent pas si comme cil Qui por eaus osteir de peril Sestudeoient en clergie & usoient ensi lor vie Quil voloient si vivre lors Que il sostenissent leur cors Tant com au siecle se vivoient Si comme cil qui bien savoient

[col. 2]

Que po leur durroit ceste vie Si navoient nul autre envie Forz de querre teile science Dont il eussent sapience De quennoistre le soverain Qui tout avoit fait de sa main & penserent bien en leur sens Comme genz de noble porpens Qui ja nauroient quenoissance De deu ne de sa sapiance Se de ses oeures nenqueroient Ancois tant com savoir porroient Ja bien ne quenoistra le mestre Son nequeoist avant son estre Par lueure qonnoit on lourier Por ce si voldrent essaier As oevres deu premierement Por avoir plus legierement Quenoissance de son pooir & quant plus porroient savoir De ses oeures & de son senz Tant avroient meillor porpenz De ses oevres qex eles sont Qui de luis tesmongnage font Por ameir le vrai creatour Qui avoit fait si noble atour Com li cielx ere quil veoient & les estoiles qui luisoient Que nouz veous si reluisant Reluire droit en firmament & ses merveilleuses vertuz Dont il se priseroient plus & tant com plus se priseroient Plus volentiers le priseroient