BnF. Département des manuscrits. Français 24428

[col. 1]

Ensi que petit retenu En ont li grant & li menu Car nus ni ose entendre mais Por mesdizanz riches malvais Qui nul bien ne voelent aprendre Qant il voient aucun entendre Car por leur avoir faut clergie Si qa po quele nest perie & ce qui or sens en eaus est De la citei de paris nest Plus que de nule autre citei Cele ena la Nobilitei Des ·trois menieres de gent que li filosofe Poserent & comment clergie vint apris Clergie regne or a paris Ensiz com ele fist jadis A athenes / qui siet en grece Une citei de grant noblece & filosofe qui lors furent Qui les autres ensegnier durent Ne poserent selonc leur sens Fors que trois menieres de gens Clers ·chevaliers· ovriers de terre Li gaaingneor doivent querre As autres deus leur estovoir De ce quilleur covient avoir Por vivre au monde honestement & chevalier comme sergent Les dovient garder & desfendre Delun envers lautre mesprendre Clerc dovient ces deus ensegnier & de leur oevres adrecier Si que chascuns oevre ne face Donc il perde deu ne sa grace

[col. 2]

Ensi poserent troiz menieres Li sage de genz canarrieres Comme cil qui furent molt sage Quns hom ne porroit son corage Metre a ce quil puist estre adroiz En deus menieres ou en troiz Car onques navint ior de vie Que clergie & chevalerie Gaaingnier por avoir son vivre Ou chevalierie delivre Gaaingneors avoec clergie Peussent estre ior de vie Par ·i seul home a droit seves Ne aprises ne retenues A lune des troiz seulement Coment penser qadroit emprent Ancoiz que bien sache on jus & por ce poserent sanz plus Troiz menieres de genz en terre Il filosofe qui enquerre Voloient droite veritei & queroient une citei Au monde· ou melx peussent estre Ou lempeust aprendre lestre De clergie por adrecier Aus · & les autres ensegnier Donc athenes fu iadis une Ou il avoient leur commune & la regna chevalerie Premierement avoec clergie Puiz fu a romme tranlatee Qui or est de grant renommee & chevalerie irevint Qui ades pres de li se tint

[catchword:] & puiz

[Intial, col. 1, lines 14–15: Littera florissa /C/, 2 lines, in blue, ornamented with penwork in red with touches of blue, extending into left margin to form 1-sided border in red and blue]

[col. 1]

Toute riens qui de bien se paine A concordance se ramaine La septime est astronomie Qui est fiz te toute clergie Ceste ensengne raison enquerre Des choses de ciel & de terre Qui par nature faites sont Ja si lointaines ne seront Qastronomie sauroit bien Raison sauroit de toute rien Dex fist toute rien par raison Qa chascune donna son non & decreiz & diviniteiz Par coi toute crestienteiz Est convertie a droite foi De deu servir le verai roi A cui touz biens se done & lie & fist toute astronomie & ciel & terre & les estoiles Come cil qui est li droiz voiles De tout le monde governer Que riens ne puet sanz lui durer Cest li hauz astronomiens Car il seit tout & maus & biens Com cil qui fist astronomie Qon soloit tenir por amie Car cest vne ars de molt noble estre Qui bien sages en porroit estre Ce est la science qui soit Par coi on quenoit orendroit Coment le mons est compasseiz & dautres choses molt asseiz Par li seule furent trovees Les autres sis devant nomnees

[col. 2]

Sanz celes que nus ne porroit Savoir dastronomie adroit Tant fust sages ne posteis Qausiz com hache ou autre utis De masson ou de charpentier Sont estrument a son mestier Tout ensi par droit maiestiere Par coi il forme sa matiere Sont les autres ars estrument Dastronomie & fongdement & par leur sens & leur meniere Li preudomme caenarriere & oi· duc· prince & maint segnor Metoient toute leur labor En savoir les ars de clergie Por entendre astronomie Tant quil ensavoient leur part Car il savoient parleur art & lonc la volentei divine Maint grant afaire & maint convine Qui avenoient par le monde Si ne prisoient ne qune onde Qui par liaue senvait saillant Tant que toute vait defaillant Com cil qui la raison savoient Des choses qen terre avenoient Si estoit coustume a cel tans Que nus sers hom a autres gens Ne nus baz hom ne nus vaillanz Tant fust de grant richesce plains Nosoit riens des·vii·arz aprendre Por les gentix qui tuit entendre I voloient li principal Que franc fussent & liberal

[col. 1]

Si leur mistrent par tel raison Les ·vii· arz liberauz a non & a droit· car si franches sont Que larme toute franche font & sont si adroit ordenees & si entierement donees Qon ni puet rien oster ne mettre Tant sen seust on entremetre Por chose qon i tremuast Qe toutes nes desfigurast Eles sont si faites adroit Qe riens ni puet muer son droit Nus hom qui soit en tout le monde Tant soit de science parfonde Paienz· Gieuz· ne crestienz Ni pueent conquester de rienz Qui toutes les ·vii· arz lauroit En toutes loiz creuz seroit Car nus nel porroit contreter De chose quil volsist prover Par raison vive proveroit Qanquil volroit & tort & droit Si est folx qui cuide savoir A droit nule chose de voir Qui a clergie apartiengne Por nule chose qui aviengne Se par miracle navenoit De deu qui tout faire porroit Se des ·vii· arz ne seit ancois Car tout ne li vaudroit ·i· pois A ce quil peust rien monstrer Ne faus ne voir· a droit prover Car en toutes loiz sont creues Par tout ou eles sont leues

[col. 2]

Nus nest · tant soit de loi diverse Que sil entre tel gent converse Maiz quil sache rien des ·vii· arz A droit· ne prover de leur parz & nule rien de leur usage Quil nensoit creuz come sage Ne ia ne sera si payenz Que nus Gieuz ne crestienz Li peust de rien contredire De nule rien quil peust dire Ne sont pas loiz ne decretales Qautres gens tenroient a males Les constitutions quil font Por ce qautres tienent & font Toutes loiz· as ·vii· arz se tienent Toutes les croient & retienent Ou il a gent qui rien en sachent Mais que li escouters lor placent Par touz lieus par toutes faisons Sont ades voires leur raisons Ne sont pas sciences muables Car touz jorz mais seront estables Si laisserons deles atant Puiz qoi aveiz cadeuant De leur senz & de leur afaire Si deuommes apres retraire De nature· & ce qest briement Que dex cria premierement Ainz quil feist tuile autre rien Qau monde apartenist de rien Si endevonz premerains dire Por melx le monde apres descrire Car ele muet le firmament & toutes riens qont mouement

[col. 1]

Les estoiles muet et fait luire Qanqon envoit & fait deduire Par lui torne le firmament & porce que toute la gent Ne sevent pas bien que ce monte Eslongerons .i. po le conte Por faire entendre quest nature Por melx entendre lafaiture Dou monde qapres vouz dirons Sentendre voleiz les raisons De nature comment ele oevre & ce que est Damedex fist premiers nature Cest ce par coi toute riens dure Qui desouz ciel est ordenee & par li vit toute riens nee Sanz nature ne puet riens estre & si la covient premiers nestre Les gens norrir & saisoner & dex velt tout assaisoner Touz jors oevre diversement Nature fait tout ensement Com fait la hache au charpentier Qant il oevre de son mestier La hache trenche & la senvient Ou cil la dresce qui la tient Par la hache est luevre assovie & faite selonc la maistrie De la meniere de lovrier Qui de meniere a recovrier Tout ensi nature se donne La ou dex veut & habandone Car par lui est toute riens faite Si com dex la avant portraite Ensi la fait si le veut deus

[col. 2]

Senlui faut onlentrait reqeus Nature ne fait riens en vain Nanule riens ne tolt son plain Toute est la soie oevre entiere Lonc ce quele trueve matiere Soit en bestes ou soit en genz Ades est ses afaires genz Come cele qui ne fait riens Qadeu soit contraire de riens Ou matiere si laisse ou devre & com plus ia plus ioevre Si com on voit aucunes bestes Que lune si naist a ·ii· testes Ou a ·vi· piez· ou moins ·i· membre Que sa forme ne li remembre De tez voit on sovent ensi Que li ·vii sont pres que failli & li autre sont eurouz Deleur fruit et plenteurouz Tout ausi reuoit on sovent Bien avenir aucune gent Que il naissent atout sis doiz & li autres ou deus ou troiz Ou ·i· membres entiers li faut Braz· ou jambe· dont il moins vaut Lonc ce quil apartient au monde & a ·i· autre se rabonde Encors ou en membre autre chose Que forme humain n[e] li pose Ou il ifaut on piez ou mains Sovent inaist ou plus ou mains Jambe ou braz lun plus grant [de] lautre Si ravient tout autel ·i· autre Quil naist noirs et li autres blanz

[Intial, col. 1, lines 11–12: Littera florissa /D/, 2 lines, in blue, ornamented with penwork in red with touches of blue, extending into left margin to form 1-sided border in red and blue]

[Marginalia, at col. 1 line 11 gutter, in grey ink:] ·viii·

[col. 1]

Li ·uns folx· lautres plains de sans Li uns devient preudons & sages Li autres folx en tous usages Li uns sages joues devient & en viellesce folx se tient & li uns sages viex & ioues Li autres folx en tous essones Li uns graz & li autres maigres Li uns viex sains lautre halaigres Li uns greles· li autres gros Li uns est durs· li autres mos Li uns hastanz· lautres tardiz Li uns coarz· lautres hardiz Li uns boisteuz· lautres bocuz Li autres bien faiz entouz uz I· granz hom est malvais sovent & i· petiz a le cors gent Quil na membre quilli defaille & que bien nait sadroite taille Tant com a son cors apartient Beauz enfes sovent laiz devient & li laiz sovent devient beauz Li uns vieut molt de ses aveauz I· petiz hom ·i· grant engenre & i· bien granz sovent i· menre Bien petiz hom emprent grant chose Que ·i· plus granz emprendre nose Li ·i· muert iones lautre tart Qant par aage sendepart Dou siecle lone ce que nature Par lavolentei deu li dure Si reuoit on sovent en gent Que li uns a der gie entent Li autres a autre mestier

[col. 2]

Ou a feure ou a charpentier Ou a autre ou il met son tens Chascuns se done lonc son sens Na autre ne se saurott metre Dont il se seust entremetre Si bien come de celui fait Ou sa nature plus li trait Si rest ·i· autres dautre afaire Qui melx se seit metre & atraire A plusors choses assouir Quns autres ne porroit furnir Car sa nature ne doit pas Li uns haut bee & lautres bas Si voit on que sovent avient Que la ou li hom bee vient & autre foiz nenuient achief Ainz li torne tout a meschief Si qapiones puet il somer De rien quil voille afin mener Uns autres some maint afaire Dont ·i· autres ne puet rien faire Tant a engent diversitei De faiture et de volentei Qonne porrott trover en terre Deus hommes tant seust on querre Qainsi partout se resamblassent Quil ne se diverse fiassent De membres decors ou de viz Ou de sens · de faiz· ou de diz Tant est diverse sapoissance Quel nest rien quenli ait naissance Que nait ensoi sucune riens Dont uns autres na enli riens Tex est la vertus de nature

[Marginalia, at col. 2, line 15, fore-edge margin:] [manicule]