BnF. Département des manuscrits. Français 24428

[col. 1]

Itez fu leur entencions De deu quenoistre & leur raisons Car bien sorent de veritei Que dex leur avoit senz donei Por raison & droiture enquerre Des choses de ciel & de terre Tant com plus savoir en peussent Autrement rien pensei neussent Car nuz hom de ses hauz secreiz Tant soit sages hom ne discreiz Ne porroit enquerre raison Ne de ses miracles sil non Car tout seit par fine droiture Mais de cele qui par nature Sont faites en ciel & en terre Puet bien li hom faire & enquerre Daucune sil est de bon sens & en clergie met son tens & puiz que raison orent quise Par leur grant estude & aprise Par coi touz li mondes fu faiz Si com ci devant est retraiz Si penserent que bien porroient Puiz que de tout raison avoient De partie raison avoir Aucune selonc son savoir Ou au mains de ciaus quil peussent Veoir as elx com long quil fussent Ensiz volrent raison avoir De ce quil veoient movoir Les estoiles dou firmament & reluire si cleirement Ce fu ce qui lesmist en tence Premerain denqerre science

[col. 2]

Si sorent bien quil enquerroient Plus tost des choses quil verroient Que de celes dont nule part Navoient de leur elx esgart Por ce furent il esmeu De troveir ce quil ont veu Le firmament ensi movoir Tant quil enseussent le voir & dirent que mult bien faisoit Savoir ce qui a deu plaisoit & de ses oevres natureux Por mex quenoistre quil fust deux Car on ne puet trover raison De deu · se par ses oevres non Li verai preudomme ancien Quil de ce saparcurent bien Norrent de nul autre avoir cure Forz daprendre science pure Ne furent mie covoiteus Davoir ainz iot molt de ceus Qui de leur avoir saparcurent Si comme sage home quil furent Qui tost iporroient penseir Aucune foiz por esgardeir Du en despendre metre cure Quil despendissent a mesure Ou par autres oevres asseiz Qui cil onte quil ont amasseiz Si leur peust asseiz doloir De leur aprendre aucun lesoir Tant que ensis sendepartoient Qui li un en mer le getoient Li autre le clamoient quite Si senaloient comme hermite

[col. 1]

Li autre le jour departoient Ensi plusor sendepartoient ·x· Qui mains ipensassent touz dis ·x· Si com melx lor estoit avis Ne nenretenoient sanz plus Forz tant seulement por leur us & voloient bien retenir Aucunes gens por eaus servir Si quil nes convenist entendre A nule rien forz a aprendre Lors si faisoient leur maisons Ausi com en religions Ensus des gens· & se metoient En tex lieus qensamble venoient La semaine ·iii· foiz ou quatre Por eaus solacier & esbatre & rendoit chascuns sa raison Selonc la soie entention Tant quil avoient esprovei Ce que chascuns avoit trovei & faisoient de lun diaus mestre Qui plus quenissoit de leur estre & qui estoit de plus grant senz & leslisoient par consenz & recordoient leur raisons Apres oiant les compaingnons & ensamble leur recordoit Si que chascuns si acordoit Lors metoit chascuns en escrit Ce que li mestres avoit dit Tout ensi fu premiers clergiez Diaus controveiz & avanciez Tant penserent cil qui melx porent Qui de par damedeu ensorent

[col. 2]

De cui toute science naist Grant partie de ce quen naist Mais ce ne fu pas molt partains Ancois imistrent molt grant tains Car cil qui premerain estoient Tout ce qenleur tains entendoient Si enfaisoient leur escriz Si com melx leur estoit aviz Por ce que cil qapres venissent Qui entremetre senvolsissent Tenissent les escris ades / & querissent ades apres & cil apres ensi le firent Tout ce quil troverent & virent Mistrent ensamble jusqensons & concorderent leur raisons Taut firent· chascuns a son tans Quil mistrent plus de ·ii· mil / ans Ancois quil eussent aquises Les ·vii· ars ne ensamble mises Mais bien tinrent a emploie Ce quil i orent traveillie Car il savoient par leus sens Qanquil auq[i?v/n]it a leur tens Enterre /· par senz de nature Qant metre i voloient leur cure Si ne semerveilloient pas Qant il avenoit aucun qas Merveilleus en ciel et en terre Car il ensavoient enquerre La raison por coi ce estoit Puiz que par nature avenoit & si en amoient deu plus Qant il veoient ses vertus

[col. 1]

Dont il vueillerent maintes nuiz Si leur estoit molt granz deduiz Qant si haute chose trovoient Donc envers deu tant samendoient Quil quenoissoient veritei & laissoient la vanitei De cestui siecle qui po vaut Por avoir joie qui ne faut Donc maint filosofe mort furent Atort· & sanz pechie morurent Por droiture quil anoncoient As granz segnors & leur blamoient Leur mauvaistie & leur ordure & leur preeschoient droiture & cil qui croire nes voloient & qui honte avoir icuidoient De ce qensiz les blamoit on Les faisoient metre en prison Ou il les faisoient ocirre Donc cil soufroient le martire Por droiture & por veritei Donc il [c/e?]rent enheritei Si com li saint qui mort soufrirent Por le droit quil essaucier firent Si ot de ceaus qui par leur sens Profetizerent le saint tens De la venue ihesu crist Si comme virgiles qui dist Qui fu au tens cesar de Romme Donc maint devindrent puiz prodomme Dist qune novele lingnie Estroit don haut ciel essaucie Qui en terre feroit vertus Donc deables seroit conclus

[col. 2]

Donc sains polx qui vit ses escriz Qui molt prisa lui & ses diz Dist delui de cuer irascu Ha? queil ie teusse rendu A deu· se tu fusses vescuz Tant que je fusse a toi venuz ·Autres filosofes iot Donc chascuns dist aucun bon mot Mais ne poons or pas tout lire Touz les biens que on porroit dire Prodomme furent et vaillant Qant clergie mistrent avant Car se par clergie ne fust Ja ne seust on que dex fust & sil ne fussent si prodomme Jamais ni eust si grant somme De clergie com il a ores Si ipeust on bien encores Trover auques sil fussent teil & il feissent autreteil Com il firent premierement Mais clergiez vait si a noiant Si parpo que ne perist toute Par coi la gent ne voient goute Car cil qui denssent entendre Au bien· & les autres aprendre & doner essample de bien Ce sont cil qui mains font debien Si com par leur folie avient Que nus; clergie pres ne tient Ne nus adroit ne si alie Ne quierent forz avoir la lie Car nus ne quiert forz tant savoir Quil enpuissent cong[e?]rre avoir·

[col. 1]

& qant il a avoir asseiz Si vaut pis que devant asseiz Car avoirs si soupriz les a Ne pueent entendre fors la Maint povre sont qui apenroient Volentiers sil pooir avoient Ni pueent pas ensi entendre Por leur niure quil nont ou prendre Nenont de cor avoir nul livre Ains leur quient querre leur vivre Car li riche ont trestout saisi Que li povre sont tuit vezi Si a mains clers qui riche sont Qui les granz mons de livres ont Duns & dautres mult aorneiz Mult en ia des asseneiz Des bons clers· car plus ne requierent Mais que le los des genz aquierent & ensi prennent leur escoz & font ensi comme li coz Qui sa viande porchacoit On fumier ou gratant aloit Tant quil troua la riche iamme Qui de clartei rendoit grant flamme Lors la commence a regarder & puiz la laist tantost ester Car ce ne velt pas demander Ou auques porroit conquester Melx aime aquerre sa viande Car de jamme point ne demande Ausi est de ces covoiteus Qui ont les livres precieus & aorneiz mult bien & bel & nenregardent que lapel

[col. 2]

Porce qun po li samble biaus Tant com li livres est noviaus Si lesgardent aucune foiz Por la biantei ·ii· foiz ou troiz Ne plus nenfont qui le resgart Puiz se retornent dautrepart Si pensent de leur ventre emplir & leur desirriers acomplir & sil voloient bien entendre Il porroient asseiz aprendre Car le pooir bien en auroient & autreteil faire porroient Com cil firent ca en arriere Qui par leur sens & leur meniere Les troverent premierement Mais or ont fol entendement & par ce perissent les arzs Si qapoines seit on les pars Le premier livre de gramaire Qui des ars est premiere maire Ainz boutent les ars en leur males Si oient lois & decretales Tantost· ou il devienent mire Por avoir· ou maufeiz se mire Nencor nel font pas por savoir Tant com por gaaignier avoir Une coustume a aparis Que maint clerc cuident avoir pris Destre maistre & avoir le non Ne plus nenquierent qui le non So ont plus chier le non de mestrie Si qui vaniteiz les mestrie Mais atort sont mestre clamei Car po sevent de veritei

[col. 1]

Tantost com il ont non de mestre Si laissent de clergie lestre & se prennent au gaengnier Comme marcheant corretier Ensi ont au siecle le non Maint qui po sevent de raison Ne se donnent pas selonc droit Qui ce covoitent orendroit Autrement enz ars sordenerent Cil qui premiers les controverent Premiers entrerent en gramaire Por ordre en leur raison atraire & puiz logique por prover Le fauz & le voir demonstrer Apres rectorique troverent Por droiture cui molt amerent Puiz troverent geometrie Por mesurer toute maistrie & puiz arimetique apres Por estre en choses plus discres Puiz de musique la science Por metre en choses concordence Au darriers noblierent mie Astronomie leur amie Car por li furent esmeu Davoir science de vertu Ensi les ·vii· arz ordenerent Cil qui apremiers les troverent & sont ensi entrelacies Queles ne pueent estre mies Lune sanz lautre entierement Ne sauver si parfeitement Les premiers sanz les daerrains Ne celes sanz les premerains

[col. 2]

Qui lune vieut adroit entendre De toutes li covient aprendre Autrement ne puet on savoir Apertement ne fauz ne voir Car lune & lautre est si commune Que savoir convient de chascune Maiz nenquierent forz tant aprendre Que deniers enpuissent atendre Por menoier & por despendre Mettent leur cure acien aprendre & por ce font trop a blameir De ce dont cil font a loeir Qui se traveillerent premiers Dont il nouz ert si granz mestiers De ce qescrites les avons & ce po que nouz enavons Car se clergie fust perdue Ja rien de deu ne fust seue Ne jamaiz les genz ne seussent Qel chose mex faire peussent Si fust touz li mondes dampneiz & mar fust onques li hom neiz Car rien ne fust par lui seue Ne que par une beste mue & touz li biens qest or seuz Est des ·vii· arz touz esmeuz Que cil troverent par leur sens Que par ce orent il porpens De deu amer & la vertu & que dex est ades & fu & si le crurent plus de foi Si com en lanciane loi Maiz or perissent les clergies Par noz maus & par noz envies