f 31

and was a gret astronomer & seþen he was keper of
þe lond of p[r]ince corodan & gou[er]ned hit ryȝt wel in þ[a]t
maner þ[a]t whan þe p[r]ince was ded he weddyd þe lady
þ[a]t men callid quatrige & macomet fel ofte into þe fally[n]g
euel wherfore þe lady was wroth þ[a]t sche had take hym
to hosbonde but he made here to leue þ[a]t eche tyme þat
he fel so gabriel þe angel spak to hym & for gret
bryhtnes of hym he fel dou[n] þis macomet regned
maraby þe ȝere of oure lord vj C & xx and was
of þe kyng of dysmael þ[a]t was abraham ys sone þ[a]t
he gat of agar in his chau[m]bre & þ[er]fore sarzenys beth
callid ismaelites & su[m] amonites aft[er] ij sonys of loth and
also macomet lofed wel an eremyte a good man þat
dwellid in wyldirnes a myle fro mou[n]t Synay in þe
vale as men goth fro araby to calde & Inde a day io[ur]ne
fro þe see þ[er] marchau[n]dis of venys come þ[a]t macomet went
so ofte into þ[a]t eremytage þ[a]t al his men were wroþ for
he herde gladly þis eremyte p[er]che and made his men
wake al þe nyȝt & his men thoȝt þey wolde þis eremyte
were ded so hit befel vpon a nyȝt þ[a]t macomet was
dronke of good wyn & he fel a slepe & his men tok
his swerd out of his schepe whylys he slep & þ[er]wiþ þay
slow þe eremyte & seþþen þay putte hit vp aȝen al
blody and at morne whan he awok & fond þe eremyte
ded he was ful wroþ & wolde haue do his men to deth
but þay al w[i]t[h] on acord sayde he hym self had slayn hy[m]
whan he was dronkyn & schewid hym his swerd al
blody & þan he trowyd þay sayde soþ & þan he cursid
þe wyn & al þo þ[a]t drynkiþ hyt & þ[er]fore sarzenys þ[a]t
beþ deuowte drinkiþ no wyn but som drynkiþ hit
p[re]uyly & ȝif þay drinke wyn openly þay schalbe rep[ro]uyd