55v La Nouvele Complainte doutremer

Maugrei eulz ⋅ font ele penance
Queles ont sanz pain ⋅asse painne
Et si nont pas ⋅ la pance plainne ⋅
Naiez paour ⋅je ne di pas
Que vos meveiz isnelepas
Por la sainte ⋅ terre deffendre
Mais vos poeiz ⋅ entor vos prendre
Asseiz de povres ⋅ gentilz homes
Qui ne mainnent soumiers ne soumes
Qui doient ⋅ et nont de quil paient
Et lor enfant de fain sesmaient
A cex doneiz ⋅ de votre avoir
Dont par tens ⋅ porreiz pou avoir
Ces envoiez outre la meir
Et vos faites ⋅ a Dieu ameir
Montreiz ⋅ par bouche et par example
Que vos ameiz Dieu et le Temple

Clerc ⋅ a aise ⋅ et bien sejornei
Bien ⋅ vestu ⋅ et bien sejornei
Dou patrimoinne ⋅ au Crucei
Je vos promet ⋅ e vos afi
Se vos failliez ⋅ Deu orendroit
Quil vos faudra ⋅ au fort endroit
Vos sereiz ⋅ forjugie en court
Ou la riegle faut qui or court
Por ce te fais ⋅ que tu me faces
Non pas por ce ⋅ que tu me haces
Diex vos fait bien ⋅ faites li dont
De quoi ⋅ de cuer et darme don
Si fereiz que preu ⋅ et que sage
Or me dites ⋅ queil aventage
Vos puet faire ⋅ votres trezors
Quant larme iert ⋅ partie dou cors
Li executeur ⋅ le retiennent
Ju qua tant qua lor fin reviennent
Chacuns son eage a son tour
Cest maniere ⋅ dexecutour
Ou il avient par mecheance
Quil en donent ⋅ por reparlance
Xx. paire de solers ⋅ ou trente
Or est sauve ⋅ larme dolante

Chevaliers ⋅ de plaiz et daxises
Qui par vos faites vos justices
Sens jugement ⋅ aucunes fois
Tot i soit ⋅ sairemens ⋅ ou foiz
Cuidiez vos ⋅ toz jors ⋅ einsi faire
A un chief ⋅ vos covient il traire
Quant la teste est ⋅ bien avinee
Au feu ⋅ deleiz la cheminee
Si vos croiziez ⋅ sens sermoneir
Donc verriez ⋅ grant coulz doneir
Seur le sozdant ⋅ et seur sa gent
Forment les aleiz ⋅ damagent
Quant vos ⋅ vos leveiz au matin
Saveiz changie votre latin
Que gari sunt tuit li blecie
Et li abatu ⋅ redrecie
Li un vont au lievres chacier
Et li autre ⋅ vont porchacier
Cil panront .i. mallart ou deux
Car de combatre nest pas geux
Par vos faites voz jugemens
Qui sera votres dampnemens
Se li jugemens ⋅ nest loiaus
Boens ⋅ et honestes et feaus
Qui plus vos done ⋅ si at droit
Ce faites ⋅ que Diex ne voudroit
Ainsi defineiz ⋅ vostre vie
Et lors que li cors ⋅ se devie
Si trueve larme ⋅ tant a faire