57v Li Diz de la voie de Tunes

Sa il asseiz eu
Et anui et contraire
Mais si con Dieux trouva
Saint Andreu debonaire
Trueve il le roi Thiebaut
Doulz et de boen afaire

Et li dui fil le roi
Et lor couzins germains
Ce est li cuens dArtois ⋅
Qui nest mie dou mains
Revont bien enz dezers
Laboreir de lor mains
Quant par meir vont requerre
Sarrazins et Coumains

Tot soit qua moi bien faire
Soie tardiz et lans
Si ai je de pitie
Por eulz le cuer dolant
Mais ce me reconforte
Quiroie je celant
Quen lor venues vont
En paradix volant

Sains Jehans eschiva
Compaignie de gent
En sa venue fist de sa char
Son serjant
Plus ama les desers
Que or fin ne argent
Quorgueulz ne li alast
Sa vie damagent

Bien doit ameir le cors
Qui en puet Dieu servir
Quil en puet paradix
Et honeur deservir
Trop par ainme son aise
Qui lait larme aservir
Quen enfer sera serve
Par son fol mes servir

Veiz ci mult biau sarmon
li rois va outre meir
Pour celui roi servir
Ou il na point dameir
Qui ces .ij. rois vodra
Et servir et ameir
Croize soi voit apres
Mieulz ne puet il semeir

Ce dit cil qui por nos
Out asseiz honte et lait
Nest pas dignes de moi
Qui por moi tot ne lait
Qua pres moi wet venir
Croize soi ne delait
Qui apres Dieu nira
Mal fu norriz de lait

Vauvaseur bacheleir
Plain de grant non savoir
Cuidiez vos par desa
Pris ne honeur avoir
Vous vous laireiz morir
Et porrir votre avoir
Et ce vos vos moreiz
Diex nou quiert ja savoir

Dites aveiz vos pleges
De vivre longuement
Je voi aucun riche home
Faire maisonnement
Quant il a assouvi
Trestout entierement
Se li fait hon .i. autre
De petit coustement