18r La Complainte de monseigneur Joffroi de Sergines

OverviewTranscribeVersionsHelp

Facsimile

Transcription

Status: Incomplete
Show Translation

Le preu des armes ⋅ por les cors
Qui riens plus ⋅ ne vuelent conquerre
Fors le cors ⋅ honoreir seur terre
Ainsi est partie ⋅ la riegle
De ceulz dordre et de ceulz dou siecle
Mais qui porroit ⋅ en lui avoir
Tant de proesse ⋅ et de savoir
Que larme fust ⋅ et nete et monde
Et li cors honoriez au monde
Ci auroit trop bel aventage

Mais de ceux ⋅ nen sai je cun sage
Et cil est plains ⋅ des dieu doctrines
Mes sires Joffrois ⋅ de Sergines
A non li preudons ⋅ que je noume
Et si le tiennent a preudoume ⋅
Empereour ⋅ et roi et conte
Asseiz plus ⋅ que je ne vos conte
Touz autres ⋅ ne pris .ii. espesches
Envers li ⋅ car ces bones tesches
Font bien partout a reprochier
De ces teches vos voel touchier
Un pou celonc ce ⋅ que jen sai
Car qui me metroit a lessai
De changier ⋅ arme ⋅ por la moie
Et je a leslire venoie
De touz ceulz ⋅ qui orendroit vivent
Qui por lor arme ⋅ au siecle estrivent
Tant quierent pain ⋅ trestot deschauz
Par les grans froiz et par les chauz
Ou vestent haire ⋅ ou ceignent corde
Ou plus fassent ⋅ que ne recorde
Je panroie ⋅ larme de lui
Plus tost asseiz ⋅ que la nelui
Dendroit dou cors ⋅ vous puis je dire
Que qui me metroit ⋅ a leslire

Luns des boens chevaliers de France
Ou dou roiaume ⋅ a ma creance
Ja autre ⋅ de lui nesliroie
Je ne sai ⋅ que plus vos diroie
Tant est preudons si com moi cemble
Qui a ces ⋅ ii ⋅ choses encemble
Valeur de cors ⋅ et bontei darme
Garant li soit ⋅ la douce dame
Quant larme dou cors partira
Quele sache ⋅ quel part ira
Et le cors ait en sa baillie
Et le maintiegne en bone vie
Quant il estoit ⋅ en cest pais
Que ne soie ⋅ por folz naïz
De ce que jai le lolz tenu
Ni estoit jones ⋅ ne chenuz
Qui tant peust ⋅ des armes faire
Dolz et cortoiz et debonaires
Le trovoit hon ⋅ en son osteil
Mais aulz armes ⋅ autre que teil
Le trovast ⋅ li siens anemis
Puis quil ci fust ⋅ mesleiz et mis
Mult amoit Dieu et sainte esglise
Si ne vousist ⋅ en nule guise
Envers nelui ⋅ feble ne fort
A son pooir ⋅ mespanrre a tort
Ses povres voizins ama bien
Volontiers ⋅ lor dona dou sien
Et si donoit ⋅ en teil meniere
Que mieulz valoit ⋅ la bele chiere
Qu’il fassoit ⋅ au doneir le don
Que li dons ⋅ icist boens preudons
Preudoume crut ⋅ et honora
Ainz entour ⋅ lui ne demora
Fauz lozengiers ⋅ puis quil le sot

Notes and Questions

Nobody has written a note for this page yet

Please sign in to write a note for this page