13v

Ni at si fol · qui ne le voie
Quant Coustantinnoble est perdue
Et la Moree se ravoie
A recevoir teile escorfroie
Dont sainte eglize · est perdue
Quen cors at petit datendue
Quant il at la teste fendue
Se Jhesucriz · ni fait aiue
A la Sainte Terre absolue
Bien li est esloigniee joie

Dautre part viennent li Tartaire
Que hom fera · mais a tart taire
Com navoit cure daleir querre
Diex gart Acre · Jaffes · Cezeire
Autre secors ne lor puis feire
Car je ne sui · mais hom de guerre
Ha Antioche · Sainte Terre
Qui tant coutastes a conquerre
Ainz con vos peust · a nos trere
Qui des cielz cuide ovrir la serre
Conment puet teil doleur sofferre
Cil at Dieu · ciert donc par contrere

Isle de Cret · Cosse · Sezile
Chipre · douce terre · et douce isle
Ou tuit avoient · recovrance
Quant vos seroiz · en autrui pile
Li rois tanra · desa concile
Conment Ayoulz · sen vint en France
Et fera · nueve remenance
A cex qui font · nueve creance
Novel Dieu· et nueve evangile
Et laira semeir · par doutance
Ypocrisie · sa semance
Qui est dame de ceste vile
[S]^{1this letter is absent from this manuscript, but appears in the other copy}e le denier · que hon at mis

En celx qua Dieu · ce font amis
Fussent mis · en la Terre Sainte
Ele en eust · mains danemis
Et mains tost ce fust entremis
Cil qui la ja brisie et frainte
Mais trop a tart · en fais la plainte
Quele est ja si forment empainte
Que ces pooirs · nest mais demis
De legier · sera mais atainte
Quant sa lumiere est ja estainte
Et sa cire devient remis·

De la Terre Dieu · qui empire
Sire Diex · que porront or dire
Li rois et li cuens de Poitiers
Diex resueffre · novel martyre
Or faissent large cemetyre
Cil dAcre · quil lor est mestiers·
Touz est plains derbe · li santiers·
Com suet batre si volentiers
Por offrir sarme · en leu de cyre
Et Diex na mais · nuns cuers entiers ·
Ne la terre na nuns rentiers ·
Ansois se torne · a desconfire

Jherusalem · ahi · hai ·
Com ta blecie · et esbahi
Vainne gloire · qui toz maux brace
Et cil qui ceront envaÿ
Si cherront lai · ou cil chaÿ ·
Qui par orguel · perdi sa grace
Or dou foir la mors les chace
Qui lor fera · de pie eschace
Tart crieront · trahi trahi·
Quele at ja entesei sa mace
Ne jusquau ferir ne menace
Lors harra Diex qui le haÿ ·