ENPages
8v La Complainte d'outremeir
Cest la complainte doutremeir Empereour et roi et conte Et duc et prince a cui hom conte Romans divers por eux esbatre De cex qui ce suelent combatre Sa en arrier por sainte eglise Car me dites par queil servise Vos cuidiez avoir paradix Cil le gaaignerent ia diz Dont vos oeiz ces romans lire Par la poinne par le martyre Que li cors soffrirent sus terre Veiz ci le tenz diex vos vient querre Braz estanduz de son sanc tainz Par quoi li fex vos iert estains Et denfer et de purgatoire Reconmenciez novele estoire Serveiz dieu de fin cuer entier Car dieux vos moustre le sentier De son pays et de sa marche Que hom cens raison le sormarche Por ce si devriiez entendre A revangier et a deffendre La terre de promission Qui est en tribulacion Et perdue ce Diex nem pence Se prochainnement na deffence Soveigne vos de dieu lo peire Qui por soffrir la mort ameire Envoia en terre son fil
9r La Complainte d'outremeir
Or est la terre en grant peril Lai ou il fut et mors et vis Je ne sai que plus vos devis Qui naiderat a ceste empointe Qui ci ferat le mesacointe Pou priserai tout lautre afaire Tant sache lou papelart faire Ainz dirai mais et jor et nuit Nest pas tout ors quanque reluit Ha ⋅ rois de France rois de France La loiz la foiz et la creance Vat presque toute chancelant Que vos iroie plus celant Secoreiz la quor est mestiers Et vos et li cuens de Poitiers Et li autre baron encemble Natendeiz pas tant que vos emble La mort larme por deu seigneur Mais qui vorra avoir honeur En paradix si la deserve Car je ni voi nule autre verve
Jhesucriz dist en lewangile Qui nest de truffe ne de guile Ne doit pas paradix avoir Qui fame et enfans et avoir Ne lait por lamour de celui Quen la fin iert juges de lui
Asseiz de gens sunt mout dolant De ce que hom trahi Rollant Et pleurent de fauce pitie Et voit ax eux lamistie Que Deux nos fist qui nos cria Qui en la sainte croix cria Au Juys que il moroit de soi Ce nert pas por boivre a guersoi Ainz avoit soi de nos raiembre Celui doit hon douteir et criembre Por teil seigneur doit hom ploreir Quensi se laissat devoreir Quil ce fist percier le costei Por nos osteir de mal hosteil Dou costei issi sancz et eigue Qui ces amis netoie et leive
Rois de France qui aveiz mis Et votre avoir et voz amis Et le cors por dieu en prison Ci aurat trop grant mesprison Ce la sainte terre failliez Or covient que vos i ailliez Ou vos i envoiez des gent Cens apairgnier or et argent Dont li droiz dieu soit chalangiez Diex ne wet faire plus lons giez A ces amis ne longue longe Ansois i wet metre chalonge Et wet cil le voisent veoir Qua sa destre vorront seoir
Hay prelat de saint eglise Qui por gardeir les cors de byse Ne voleiz leveir aux matines Messires Joffrois de Sergines Vos demande de la meir Mais je di cil fait a blameir Qui nule riens plus vos demande Fors boens vins et boenne viande Et que li poivres soit bien fors Cest votre guerre et votre effors Cest vostre diex cest votre biens Votre peires itrait le fiens Rutebues dit qui riens ne soile
9v La Complainte d'outremeir
Quasseiz aureiz ⋅ dun poi de toile Se les pances ne sont trop graces Et que feront les armes lasses Elz iront lai ou dire noze Diex iert juges de ceste choze 4 LINES IN OTHERS NOT HERE
Hai grant clerc grant provendier Qui tant estes grant vivendier Qui faites Dieu de votre pance Dites moi par queil acointance Vos partireiz au Dieu roiaume Qui ne voleiz pas dire .I. siaume Dou sautier tant estes divers Fors celui ou na que ii vers Celui dites apres mangier Diex wet que vos laleiz vengier Sanz controuveir nule autre essoinne Ou vos laissiez le patrimoinne Qui est dou sanc au crecefi Mal le teneiz jou vos afi Se vos serveiz Dieu a lesglise Dieux vos resert en autre guise Quil vos paist en votre maison Cest quite a quite par raison Mais ce vos ameiz le repaire Qui sanz fin est por joie faire Achateiz le car Diex le vent Car il at mestier par couvent Dacheteours et cil sengignent Qui orendroit ne le bargignent Car teil fois le vorront avoir Com ne laurat pas por avoir
Tornoieur et vos que dirois Qui au jor dou juise irois Devant Dieu que porroiz respondre Car lors ne se porront reponrre Ne genz clergies ne gens laies Et Dieux vous monterra ces plaies Ce il vos demande la terre Ou por vos vout la mort soffere Que direiz vos je ne sai quoi Li plus hardi seront si quoi Com les porroit panrre a la main Et nos navons ⋅ point de demain Car li termes vient et aprouche Que la mors nos clourat la bouche
Ha Antioche ⋅ terre sainte Con ci at delireuze plainte Quant tu nas mais ⋅ nuns Godefrois Li feux de charitei est frois En chacun cuer de crestiien Ne jone home ne ancien Nont por Dieu cure de combatre Asseiz se porroit ja debatre Et Jacobins et Cordeliers Quil trovassent ⋅ nuns Angeliers Nuns tangreiz ⋅ ne nuns Bauduÿns Ansois lairont aux Beduÿns Maintenir la terre absolue Qui par defaut nos est tolue Et Dieux lat ja dune part arse Dautre part vienent cil de Tarse Et Coramin et Chenillier Revanrront por tot escillier Ja ne serat qui la deffande Ce mes sires Joffrois demande Secours si quiere qui li fasse Car je ni voi nulle autre trasce ⋅ Car com plus en sarmoneroie Et plus lafaire empireroie Cilz siecles faut qui bien fera
10r La Complainte d'outremeir & La Desputizons dou Croisie et dou Descroisie
apres la mort le trovera Explicit
Ci Coumence la desputizons dou croisie et dou descroizie
Lautrier entour la Saint Remei Chevauchoie por mon afaire Pencix car trop sunt agrami La gent dont Diex at plus a faire Cil dAcre qui nont nul ami Ce puet on bien por voir retraire Et sont si pres lor anemi Qua eux pueent lancier et traire
Tant fui pancis a ceste choze Que je desvoiai de ma voie Com cil qua li meimes choze Por le penceir que gi avoie Une maison fort et bien cloze Trouvai dont je riens ne savoie Et cestoit la dedens encloze Une gent que je demandoie
Chevaliers i avoit teiz quatre Qui bien seivent parleir fransois Soupei orent si vont esbatre En un vergier deleiz le bois Ge ne me voulz sor eux embatre Que ce me dist ⋅ uns hom cortois Teiz cuide compaignie esbatre Qui la toust cest or sans gabois
Li dui laissent parleir les deux Et je les pris a escouteir Qui leiz la haie fui touz seux Si descent por moi acouteir Si distrent entre gas et geux Teiz moz con vos morreiz conteir Siecles i fut nomeiz et Deus De ce pristrent a desputeir
Li uns deux avoit la croix prise Li autres ne la voloit prendre Or estoit de ce lor emprise Que li croiziez voloit aprendre A celui qui pas ne desprise La croix ne la main ni vuet tendre Quil la preist par sa maitrize Ce ces sans ce puet tant estendre
Dit li croisiez premierement Enten a moi biaux dolz amis Tu seiz moult bien entierement Que Diex en toi le san a mis Dont tu connois apertement Bien de mal amis danemis Se tu en euvres sagement Tes loiers ten est promis
Tu voiz et parsois et entens Le meschief de la Sainte Terre Por quest de proesse vantans Qui le leu Dieu lait en teil guerre Suns hom pooit vivre .c. ans Ne puet il tant doneur conquerre Com se il est bien repentans Daleir le Sepuchre requerre
Dit li autres jentens moult bien Por quoi vos dites teiz paroles Vos me sermoneiz que le mien Doingne au coc et puis si men vole Mes enfans garderont li chien Qui demorront en la parole (pailliole) Hon dit ce que tu tiens si tien Ci at boen mot de bone escole
10v La Desputizons dou Croisie et dou Descroisie
Cuidiez vos or que la croix preingne Et que je men voize outre meir Et que les .c. soudees deingne Por .xl. cens reclameir Je ne cuit pas que Deux enseingne Que hom le doie ainsi semeir Qui ainsi senme pou i veigne Car hom le devroit asomeir
Tu naquiz de ta mere nuz Dit li croisiez cest choze aperte Or iez juqua cet tens venuz Que ta chars est bien recoverte Quest Diex ne quest lors devenuz Qua cent dobles rent la deserte Bien iert por mescheanz tenuz Qui ferat si vilainne perde
Hom puet or paradix avoir Ligierement Diex en ait loux Asseiz plus, ce poeiz savoir (?) Lacheta sainz Piere et sainz Poulz Qui de si precieux avoir Com furent la teste et li coux Laquistrent ce teneiz a voir Icist dui firent .ii. biaux coux
Dit cil qui de croizier na cure Je voi merveilles dune gent Qui asseiz sueffrent poinne dure En amasseir .i. pou dargent Puis vont a Roume ou en Esture Ou vont autre voie enchergent Tant vont cerchant bone aventure Quil nont baesse ne sergent
Hom puet moult bien en cet paÿx1we included the dieresis here to maintain the meter and because it appears in our manuscript AAL removing them for copy Oct 14 , will explain) Gaiaignier Dieu cens grant damage Vos ireiz outre mer lays Qua folie aveiz fait homage Je di que il est foux nayx Qui se mest en autrui servage Quant Dieu puet gaaignier sayx Et vivre de son heritage
Tu dis si grant abusion Que nus ne la porroit descrire Qui wes sans tribulacion Gaaignier Dieu por ton biau rire Dont orent fole entencion Li saint qui soffrirent martyre Por venir a redempcion Tu diz ce que nuns ne doit dire
Ancor nest pas digne la poingne Que nuns hom puisse soutenir A ce qua la joie sovrainne (pui)error Puisse ne ne doie venir Por ce se rendent tuit cil moinne Qua teil joie puissent venir Hom ne doit pas douteir essoinne Con ait pour Dieu juquau fenir
Sire qui des croix sermoneiz Resoffreiz moi que je deslas Sermoneiz ces hauz coroneiz Ces grans doiens et ces prelaz Cui Diex est toz abandoneiz Et dou siecle toz li solaz Ciz geux est trop mal ordeneiz Que toz jors nos meteiz es laz
Clerc et prelat doivent vengier La honte Dieu quil ont ces rentes Il ont a boivre et a mangier Si ne lor chaut cil pluet ou vente Siecles est touz en lor dangier Cil vont a Dieu par teile sente