f. 86r

DAmoiselle sapience sen ala oultre mer
en pelerinage par devotion · cy entra en une
cite que on appelle bethleem et rex juda a destre · la
vit une maison ou moult de gens repairoient
parquoy la maison estoit appelle diversoire · do-
maiselle sadressa a celle maison et entra dedens
et vit en une partie ung lieu gaste aussi come une
estable · dedens trouva une cresche et une pucelle
apoyee a celle cresche qui regardoit dedens moult
ententivement sans regarder ailleurs et moult bien
sembloit quelle sesmerveillast de ce quelle veoit · Sapience la salua et
luy demanda quelle chose elle regardoit si entendanment ·
Celle respondit et dist je regarde merveille · Et
celle saprouche pres et vit ung enfant qui gesoit
en la cresche sur ung peu de fain envolope de petiz
drapeletz · Bel estoit lenfant aultres merveilles
ny apparoit · Lors demanda sapience a lautre da-
moiselle come elle avoit en nom · Celle dist je ay
nom verite · Sapience luy demande damoiselle verite
quel merveille veez vous en cest enfant qui gist
cy · Car il ny appert merveilles par dehors non
plus quen ung aultre · Lors respondit verite ·
les merveilles qui sont en lenfant ne seront huy
dites car tant en ya que on le doit appeller les-
merveilleux sicome dit ysaie · Et vocabitur nomen
eius admirabilis · Sapience dist damoiselle verite
aprenes moy pour dieu les merveilles qui sont
en cest enfant petit qui naperent mye · Verite