2r

[col. 1]

Si dirons tout au premerain
Dou glorieux roi soverain
De la poissance nostre segnor
Quant dex fist le monde premiers
Il ne li estoit nul mestiers
Qautant olt devant com apres
Dex fu & iert & est ades
Il ne sen amenda de riens
Qonques ne li failli nus biens
Tout voit tout tient en une main
Il not onques ne soif ne fain
Tans· ne ans· mois· ne jor· ne heure
Tout ades en tous biens demeure
A lui ne tost ne tart nafiert
Qanqonques fu & est & iert
Li est devant les elx ades
Ausi bien li loins com li pres
Tout ausi bien le monde voit
Avis quil fust faiz com orendroit
Se nul monde neust fait onques
Autretant vaussist il adonques
Com il puet jamais valoir melx
Autrement ne fust il pas dex
Se tout ne veist & seust
Quanques jamais estre deust
Car il fust ensis defaillans
Daucune rien & non poissans
& de tant fust il hom mortex
Mais sa nature nest pas tex
Car il est dex entierement
Sans fin & sans commencement
Rien ne li est viez· mais novele
Ades li est et fresche & bele
Tuit li bien sont sien par nature

[col. 2]

& a lui senvont a droiture
Car de lui muevent tuit & viennent
Qui ainz jor droit chemin tienent
Il naura ja de nul mal cure
Car la bontez est toute pure
Toute nete saintisme & saine
Sanz mal· sanz nule male vaine
Car li mal li sont a contraire
Por ce les convient ensus traire
De lui & de trestouz ses biens
Car ce nest forz quordure & fiens
Sel convient venir en parfont
& le bien demorer amont
Devant deu qui est clers & purs
Li maus qui est lais & oscurs
& tenebreus seur toute rien
Descent aval & laist le bien
Car ce convient il par nature
Ausiz common voit de lordure
De vin qon a mis en vaissel
Qui li laiz se depart dou bel
Si qen haut demore li bons
& la lie se traist au fons·
Qui mauvaise est & riens ne vaut
& li bons qui demore en haut
Devient ades & clers & nes
& li mauvaiz si est espes
Tant comme li bons plus clers devient
De tant la lie plus retient
Dordure & de maleurtei
& ades a plus doscurtei
Ensi est dou bien & dou mal
Le mal convient descendre aval
En liu tenebreus & orrible

[Initial, col. 1, lines 4–5: Littera florissa /Q/, 2 lines, in red, ornamented with penwork in blue with touches of red, extending into left margin to form 1-sided border]