94r

En .ij. mil ans, sades veilloient
Tel gent sont de fol escient
Qui cuident servir de nient
Celui qui tout set et tout voit
Et qui lor pensees connoist
Encor quant il vont au mostier
Ni vont il pas, por dieu proier
Tant com por los dou monde avoir
Et proient plus por lor avoir
Que diex lor gart, et monteplie
Que por lame, qui est perie
Si est merveille, de tel gent
Qui bien pensent dedens lor sens
Et sevent que cest mals quil font
Ne ja por ce ne se faindront
Dont trop peu se pueent proisier
Quant ensi se laissent brisier
A si foible chose com cest
Li diables, dont tous mals naist
Foibles est il car il ne puet
Vaintre fors celi qui le velt
Na pooir en home fors tant
Quant amal faire, se consent
Car qui se vielt adroit conduire
Maufes na pooir de li nuire
Ne faire riens dont il se dueille
Tant com abien faire, se cueille
Si puet on bien dals dire fi
Car il sont plus vil que failli
Quant li foible ehore, les vaint