18v La Complainte de monseigneur Joffroi de Sergines
Facsimile
Car qui ce fait jel teig a sot
Ne fu mesliz ne mesdizans
Ne vanterres ⋅ ne despizans
Ainz que jeusse ⋅ racontei
Sa grant valeur ne sa bontei
Sa cortoisie ne son sens
Torneroit ⋅ a anui se pens
Son seigneur lige ⋅ tint tant chier
Quil ala avec li vengier
La honte dieu outre la meir
Teil preudoume doit hon ameir
Avec le roi ⋅ demora la ⋅
Avec le roi ⋅ mut et ala
Avec le roi prist bien et mal
Hom nat pas toz jors tenz igal
Ainz pour painne ne por paour
Ne corroussa ⋅ son Sauveour
Tout prist engrei ⋅ quanquil soffri
Le cors et larme ⋅ a Dieu offri
Ses consoulz fu ⋅ boens et entiers
Tant com il fu ⋅ poinz et mestiers
Ne ne chanja ⋅ por esmaier
De legie devra ⋅ Dieu paier
Car il le paie chacun jour
A Jasphes ⋅ ou il fait sejour
Cil at se jour de guerroier
La vuet il ⋅ son tens emploier
Felon voizin et envieuz
Et cruel et contralieuz
Le truevent ⋅ la gent sarrazine
Car de guerroier ⋅ ne les fine
Souvant lor fait ⋅ grant envaie
Que sa demeure i est haie
Des or croi ge ⋅ bien cest latin
Maulz voizins ⋅ done mau matin
Son cors ⋅ lor presente souvent
Mais il at trop petit couvent
Se petiz est ⋅ petit sesmaie
Car li paierres qui bien paie
Les puet bien ⋅ cens doute paier
Que nuls ⋅ ne se doit esmaier
Quil nait coroune de martir
Quant dou siecle ⋅ devra partir
Et une riens ⋅ les reconforte
Car puis quil sunt fors de la porte
Et il ont ⋅ mon seigneur Joffroi
Nuns doulz niert ja puis en effroi ⋅
Ainz vaut li uns ⋅ au besoig quatre
Mais cens lui ne sozent combatre
Par lui jostent ⋅ par lui guerroient
Jamais cens lui ⋅ ne ce verroient
En bataille ne en estour
Quil font de li ⋅ chastel et tour
A li sasennent et ralient
Car cest ⋅ lor estandars ce dient
Cest cil qui dou champ ⋅ ne se muet
El champ le puet ⋅ troveir qui vuet
Ne ja por fais ⋅ que il soutaigne
Ne partira ⋅ de la besoigne
Car il seit bien ⋅ de lautre part
Se de sa partie ⋅ se part
Ne puet estre ⋅ que sa partie
Ne soit tost sans li departie
Sovent asaut et va en proie
Sor cele gent qui Dieu ne proie
Ne naime ⋅ ne sert ⋅ ne aeure
Si com cil ⋅ qui ne garde leure
Que Dieux ⋅ en fasse son voloir
Por Dieu fait mult ⋅ son cors doloir
Ainsi soffre ⋅ sa penitance
Notes and Questions
Please sign in to write a note for this page