13H_141__8_1_inventaire

Inventaire fait le premier jour du mois de mars mil quatrecens quatrevings et trois par moy Jehan verne clerc Jure de la court de la mairie de dijon commis a ce par auctorite de ladite court et par ordonnance de monseigneur? maistre estienne berbisey lainse licencie en loiz conseillier du Roy nostre seigneur? et mayeur de la ville et commune dudite dijon En presence de Jaques Bourstel substitut de honnorable homme guillaume billocart procuror de ladite et commune dudit dijon le tout ala poursuite de noble homme et saige Jehan le maire seigneur de la bonduc? conseillier du roy nostre dite seigneur? et procureur generale dudit seigneur en ses parlemens de bourgogne Et par vertu de certaines lettres Royaulx de sa part impetrees a lencontre de Reverend pere en dieu labbe de clerevaulx dont le double est cy actaiche de tous les biens estans et trouvez en lostel et grant maison appellee vulgament clerevaulx et ou? pourpris dicelle asssise audit dijon en la rue de la porte au fourmorot devant la fontaine de champ damas empres la maison qui fut a feu honnorable homme Jehan Rabustel a son vivant procureur de ladit ville dune part Et les hoirs guillaume damiens dautrepart Lesquelz biens ont este Inventoriez par moy ledit commis et tauxes par gens ayans a ce cognoissance en la maniere que sensuit presens frere nicole de braoux religieux gouverneur de ladite maison de clerevaulx Thiebault petit huissier desdit parlemens perrenot bergain et Thomas Vinthier sergens de ladite mairie commis ala garde desdits? biens

Et premierement en la chambre de frere nicole de braoux gouverneur de ladite maison de clerevaulx

Ung petit banc tournis garny de sa perche une petite table de noyer encornee sortissant audit banc garnie de deux torteaulx et dung marchepied et dun petit banquier Roye tauxe ensemble ung franc pour ce 1fr

Item ung petit buffet a deux enchastres ferre et garny de serrure fermant a clef sans liettes ouvraige tout plain une vielle chayere a doz ung archebanc a doz fais? couchette sept scabelle tauxes taut ensemble trois francs Et pour ce icy iii franc i denier