Page 444

LIVRE DE GEOFFROY LE TORT (15)

SELON LE MANUSCRIT B.

Ci comence le livre de messire Jeuffroy le Tort, des assises.

1. Cest livre est fondez sur deus vers dou Sauter, lesquell sont divers et contraries l'un de l'autre. Quar l'un des vers est à porsevre sa matiere à touz ceaus qui en bien faire veulent entendre; et de l'autre vers devrait chascun eschiver la soue matiere. Icelui vers, dont l'en doit la matiere porsivre, si est celui qui dit: Inicium sapiencie timor Domini. La matiere de cestui vers sievent ceaus qui entendent à bien et à maintenir loiauté, droiture et justise et jugement, sanz amor et sanz hayne et sanz covoitise. Quar qui doute Dieu, il se poine de faire tout ce qui est desus devisé, et se garde de faire le contrare. L'autre vers, de quoi l'on doit eschiver la matiere, si dit: Quid gloriaris in malicia, qui potens es iniquitate? Ceaus qui cestui vers porsivent, il lor avient, por ce que il ne doutent Dieu et por ce que il n'ont nulle doute de Dieu, se glorefient en leur malice et sont puissanz en leur felonies. Et de ce avient que il metent toute leur sens et leur entendement en eaus assoutilliés, de querre poinz de plaiz, par quoi il puissent tolir et conquerre les autruis droiz en pointeant. Et por ce font il noveaus jugemenz, contraires au droit et as bons usages. Et pour ce que je veaus sivre la matiere de celui vers qui dit: Inicium sapiencie timor Domini, et eschiver la sentence de l'autre mauvais vers, me veull je garder d'enseigner à plaidoier et mostrer les soutillances et les poinz des plaiz. Quar la malice et la covoise des genz est si granz, que qui leur enseigneroit ces choses, et en feist livre, il feroit aussi come celui qui donroit au serpent venin à boivre; quar il crestroit mal sur mal. Et por toutes ces raisons et celes devant dites, ne veull je metre en cest livre nulles choses, mais que celes de quoi et par quoi l'en puisse delivrer à droit les quercles et les coutens qui sont à conoistre et à jugier sur la cort, de ceaus que la court devra delivrer et determiner par les assises et par les bons usages et les bones costumes dou reaume de Jerusalem, les queles l'on doit tenir ou reaume de Chipre. Et de celes choses, de quoi l'on ne trouvera que il ait assise, ne usage, ne costume, je n'en veull rienz dire de moi, selonc leur sens à leur conoissance, si come l'on doit faire de novele chose. Se ge ne puis metre en cestui livre toutes les assises et les bons usages et les hones costumes dou reaume de Jerusalem, il n'est mie merveille, quar mout a lonc tens que eles furent faites, et que l'om les comença à user. Mais je metrai ce que je ai veu user, et que je ai oï retraire et raconter en court et hors court. Et bien porra avenir que touz ceaus qui orront cest livre ne s'i acorderont mie: et si porra bien estre que aucuns seront qui verront le damage d'eaus, où il de leurs amis y sera, si leur sera à poy dou droit encontre le profit; ne à aucuns autres qui vorront mostrer que il